ខ្សែភាពយន្តខ្នាតធំដែលចាយថវិការាប់រយលាន និងពេលវេលាច្រើនឆ្នាំ Avatar: The Way Of Water បានបំបែកកំណត់ត្រាខ្សែភាពយន្តដែលរកបានប្រាក់ចំណូល១ពាន់លានពីការលក់សំបុត្រចូលទស្សនា ត្រឹមតែ១៤ថ្ងៃប៉ុណ្ណោះ។
អ្នកដឹកនាំរឿងលោក Cameron បាននិយាយនៅក្នុងបទសម្ភាសថា ការចំណាយថវិកាសម្រាប់ភាពយន្តនេះគឺចំណាយអស់ប្រមាណ ៣៥០លានដុល្លារអាមេរិក ដោយនេះមិនទាន់ដាក់បញ្ចូលថ្លៃផ្សាយពាណិជ្ជកម្មទៅលើទីផ្សារនៅឡើយ ត្រូវរកបានយ៉ាងហោចណាស់ ២ពាន់លានដុល្លារអាមេរិក ដើម្បីបំបែកកំណត់ត្រារឿង Avatar វគ្គ១ ដែលរកបានប្រមាណ ២,៩ ពាន់លានដុល្លារ។
ក្នុងខ្សែភាពយន្ត Avatar: The Way Of Water តួអង្គ Sam Worthington និង Zoe Saldana បានត្រឡប់មកវិញដើម្បីសម្តែងជាតួអង្គ Jake Sully និង Neytiri ក្រៅពីនេះ នៅមានតួអង្គល្បីៗដូចជា Sigourney Weaver Kate Winslet Stephen Lang និងMichelle Yeoh ដែលសុទ្ធតែមានវត្តមានក្នុងភាពយន្តនេះផងដែរ។
យ៉ាងណាមិញ ខ្សែភាពយន្តដែលមានរយៈពេល៣ម៉ោង ១២នាទីនេះ បានរកថវិកាយឺតជាងខ្សែភាពយន្ត Spider-Man: No Way Home ដែលរកប្រាក់ចំណូលបាន១ពាន់លាន ត្រឹមតែ១២ថ្ងៃ៕
