លោក Peskov បានប្រាប់អ្នកយកព័ត៌មានកាលពីថ្ងៃទី ១៨ ខែធ្នូ ឆ្នាំ២០២២ ថា ” លោក Vladimir Putin ទើបតែបានទូរស័ព្ទជាមួយប្រធានាធិបតី Fernandez នៃប្រទេសអាហ្សង់ទីន និងបានអបអរសាទរយ៉ាងកក់ក្តៅចំពោះគាត់ចំពោះជ័យជម្នះរបស់ក្រុមជម្រើសជាតិអាហ្សង់ទីនក្នុងព្រឹត្តិការណ៍ FIFA World Cup” ។
ប្រធានាធិបតីជាប់ឆ្នោតប្រេស៊ីល Luiz Inacio Lula da Silva ក៏បានអបអរសាទរអាហ្សង់ទីនផងដែរចំពោះជ័យជម្នះនេះ។
“រំភើបណាស់សម្រាប់ការឈ្នះរបស់អ្នកជិតខាងខ្ញុំ អាហ្សង់ទីន។ ការប្រកួតដ៏អស្ចារ្យរបស់ Messi ដែលពិតជាសមនឹងទទួលបានវា និង Di Maria សូមអបអរសាទរដល់កីឡាករ បុគ្គលិកគ្រូបង្វឹកអាហ្សង់ទីន និងមិត្តរបស់ខ្ញុំ Alberto Fernandez” ។ Lula da Silva បានសរសេរនៅលើ Twitter កាលពីថ្ងៃទី ១៨ ខែធ្នូ។
កាលពីថ្ងៃទី១៨ ខែធ្នូ អាហ្សង់ទីន បានយកឈ្នះបារាំង ៤-២ ក្នុងការស៊ុតបាល់ប៉េណាល់ទី ក្រោយពីស្មើ ៣-៣។ នេះជាលើកទី៣ហើយដែលប្រទេសនេះឈ្នះ World Cup ជើងឯកពីមុនគឺនៅឆ្នាំ ១៩៧៨ និង ១៩៨៦ ។
ក្រុមនេះក៏ទទួលបានប្រាក់រង្វាន់ជាកំណត់ត្រាសម្រាប់ការប្រកួតជើងឯក World Cup ផងដែរដែលមាន ចំនួន ៤២ លានដុល្លារ ។
ប្រធានាធិបតីបារាំង Emmanuel Macron បានផ្ញើសារជូនពរដល់អាហ្សង់ទីន។ លោកប្រធានាធិបតីបាននិយាយថា “Hooray Argentina សូមអបអរសាទរដល់កីឡាករអាហ្សង់ទីន និងប្រជាជនរបស់ពួកគេ”។
លោកក៏បានលួងចិត្តកីឡាករក្រុមម្ចាស់ផ្ទះក្រោយការចាញ់ដោយនិយាយថាពួកគេបានធ្វើឲ្យកីឡាករបារាំងមានមោទនភាព៕ ប្រភពពី៖ TASS
