ធនាគារកណ្តាលអាស៊ានចំនួន៥ប្រទេស បានចុះហត្ថលេខា លើ​ការ​ទូទាត់​ឆ្លង​ដែន​ក្នុង​តំបន់

179

នៅថ្ងៃចន្ទ ទី១៤ ខែវិច្ឆិកា ឆ្នាំ២០២២នេះ ធនាគារកណ្តាលអាស៊ីអាគ្នេយ៍ចំនួនប្រាំបានចុះហត្ថលេខា នូវអនុស្សរណៈនៃការយោគយល់គ្នាស្តីពីការទូទាត់ឆ្លងព្រំដែនក្នុងតំបន់។ ពិធីចុះហត្ថលេខានេះ​ បានធ្វើឡើងក្នុងព្រឹត្តិការណ៍មួយ មុនពេលកិច្ចប្រជុំកំពូល G20 នៅកោះបាលី។

ប្រទេស​អាស៊ាន​ទាំង​ប្រាំនោះរួមមាន៖​ ​ឥណ្ឌូណេស៊ី ម៉ាឡេស៊ី ថៃ ហ្វីលីពីន និង​សិង្ហបុរី។

ក្នុងអំឡុងពេលពិធីចុះហត្ថលេខានេះ លោក Perry Warjiyo ទេសាភិបាលធនាគារកណ្តាលឥណ្ឌូនេស៊ី បាននិយាយថា ការតភ្ជាប់ក្នុងតំបន់នឹងដំណើរការដោយប្រើកូដការឆ្លើយតបរហ័ស (QR)។ ចំពោះការ​ទូទាត់​រូបិយប័ណ្ណ​ក្នុង​ស្រុក​នឹង​ត្រូវ​បាន​ប្រើ ដូច្នេះ​នឹង​មិន​ចាំបាច់​បំប្លែង​ទៅ​ជា​ប្រាក់​ដុល្លារ​អាមេរិក​ឡើយ។

លោក Warjiyo បាននិយាយទៀតថា ប្រទេសឥណ្ឌូនេស៊ីបានភ្ជាប់ប្រព័ន្ធទូទាត់របស់ខ្លួនដោយប្រើលេខកូដ QR ជាមួយប្រទេសថៃកាលពីដើមឆ្នាំនេះ ហើយនឹងធ្វើដូចគ្នាក្នុងពេលឆាប់ៗនេះ ជាមួយប្រទេសដទៃទៀត។ សម្រាប់ការបង់ប្រាក់ឆ្លងព្រំដែន រវាងប្រទេសអាស៊ានទាំងប្រាំនឹងត្រូវតភ្ជាប់នៅឆ្នាំក្រោយ។

នៅក្នុងសេចក្តីថ្លែងការណ៍តាមរយៈវីដេអូនៅឯពិធីនេះ លោក Joko Widodo ប្រធានាធិបតីឥណ្ឌូនេស៊ី បានរំពឹងថា គំនិតផ្តួចផ្តើមការទូទាត់ឆ្លងព្រំដែននឹងត្រូវបានពង្រីកដល់កម្រិតពិភពលោក៕

ប្រភពៈ CNA