Update: អ្នកនេសាទថា យន្ដហោះធ្លាក់លឿនដូចផ្លេកបន្ទោរចូលទឹក ហើយខណ:បំណែកផ្សេងៗត្រូវបានរកឃើញ (រូបភាពច្រើន)

2284

ហ្សាការតា៖ នៅថ្ងៃអាទិត្យនេះ ក្រុមអ្នកជួយសង្រ្គោះក្នុងប្រទេសឥណ្ឌូណេស៊ី បានរកឃើញផ្នែករាងកាយមនុស្សនិងបំណែកសម្លៀកបំពាក់ក្នុងពេលស្វែងរកនៅលើផ្ទៃសមុទ្រដែលមានចំនួន ៥ថង់ និងរកឃើញបំណែកយន្ដហោះចំនួន៣ថង់ ចេញពីទីតាំង ដែលយន្ដហោះដឹកអ្នកដំណើររបស់ក្រុមហ៊ុនអាកាសចរណ៍ឥណ្ឌូណេស៊ី ស្រ៊ីវីចាយ៉ា (Sriwijaya) បានធ្លាក់កាលពីថ្ងៃសៅរ៍ម្សិលមិញ។ នេះបើតាមការចេញផ្សាយ Daily Mail នៅថ្ងៃអាទិត្យ ទី១០ ខែមករា ឆ្នាំ២០២១នេះ។

បើយោងតាមប្រភពព័ត៌មាន បានរៀបរាប់ប្រាប់ឲ្យដឹងថា អ្នកស្រុកនៅលើកោះក្បែរនោះបាន លឺសំលេងផ្ទុះពីរដងមុនពេលរកឃើញបំណែកដែកយន្តហោះ ខណ:អ្នកនេសាទម្នាក់បានប្រាប់បានឃើញពីចំងាយនូវយន្តហោះមួយនេះធ្លាក់លឿនដូចផ្លេកបន្ទោរចូលក្នុងទឹក បន្ទាប់មកក៏បានផ្ទុះតែម្ដង។

ថ្លែងប្រាប់អ្នកសារព័ត៌មាន មន្ត្រីជាន់ខ្ពស់ម្នាក់មកពីទីភ្នាក់ងារជាតិស្រាវជ្រាវ និងជួយសង្រ្គោះឥណ្ឌូណេស៊ី បានលើកឡើងដូច្នេះថា៖ «យើងទទួលបានថង់ចំនួន៣ដែលមានផ្ទុកបំណែកយន្ដហោះ និងថង់ចំនួន៥ទៀត ផ្ទុកបំណែកសាកសពមនុស្ស»។ មន្ត្រីជាន់ខ្ពស់រូបនេះបន្ថែមទៀតថា បំណែកសាកសព នឹងត្រូវបានបញ្ជូនទៅកាន់ការិយាល័យជំនាញ ដើម្បីបញ្ជាក់អត្តសញ្ញាណ រីឯបំណែកយន្ដហោះនឹងត្រូវបញ្ជូនទៅកាន់គណៈកម្មាធិការសុវត្ថិភាពដឹកជញ្ជូន ដើម្បីវិភាគ។ អ្នកដំណើរចំនួន ៥៦ នាក់ត្រូវបានគេរាយការណ៍ថានៅលើយន្តហោះ ក្នុងនោះក៏មានក្មេង ៧ នាក់និងទារក ៣ នាក់។

នៅថ្ងៃអាទិត្យនេះដែរ ប្រតិបត្តិការតាមរកយន្ដហោះដឹកអ្នកដំណើរ Boeing 737-500 ដែលធ្លាក់ខាងលើ បានចាប់ផ្ដើមឡើងវិញហើយ ក្រោយត្រូវបានផ្អាកកាលពីយប់ថ្ងៃសៅរ៍ ដោយមានការចូលរួមពីនាវាចំនួន១០គ្រឿង និងក្រុមអ្នកជំនាញមុជទឹកជាច្រើននាក់។ បើតាមអាជ្ញាធរឥណ្ឌូណេស៊ី ពួកគេបានរកឃើញនូវទីតាំងដែលយន្ដហោះដឹកអ្នកដំណើរ នេះធ្លាក់ និងបានចាប់សញ្ញាចំនួន២ ដែលទំនងជាមានប្រភពចេញពីប្រអប់ខ្មៅ ព្រមទាំងប្រមូលបានបំណែកសាកសព និងបំណែកមួយចំនួន ដែលពួកគេជឿជាក់ថាជារបស់ យន្ដហោះទៀតផង។

ថ្លែងប្រាប់អ្នកសារព័ត៌មាន ប្រធានក្រុមអ្នកស្រាវជ្រាវ និងជួយសង្រ្គោះឥណ្ឌូណេស៊ី លោក Bagus Puruhito បានគូសបញ្ជាក់ដូច្នេះថា៖ «យើងចាប់បានសញ្ញាចំនួន២ ដែលទំនង ជាចេញពីប្រអប់ខ្មៅនៃយន្ដហោះដែលបានធ្លាក់។ យើងនឹងបន្តស៊ើបអង្កេតជាបន្ត»។

គួរបញ្ជាក់ថា មកទល់ពេលនេះ ប្រតិបត្តិការជួយសង្រ្គោះ និងតាមរកយន្ដហោះដែលបានធ្លាក់ចូលក្នុងសមុទ្រ នៅតែបន្តធ្វើឡើងនៅឡើយ។ យន្តហោះដឹកអ្នកដំណើរខាងលើ ដែលមានជើងហោះហើរ SJ182 របស់អាកាសចរណ៍ឥណ្ឌូណេស៊ី ស្រ៊ីវីចាយ៉ា (Sriwijaya) ដែលដឹកអ្នកដំណើរ៥០នាក់ និងក្រុមការងារយន្តហោះ១២នាក់ (សរុប៦២នាក់) បានចាកចេញពីអាកាសយានដ្ឋានអន្តរជាតិទីក្រុងហ្សាការតា កាលពីវេលាម៉ោង ២៖៣៥នាទីរសៀល (ម៉ោងនៅហ្សាការតា) ហើយគ្រោងទៅចុះចតនៅអាកាសយានដ្ឋាន នៃទីក្រុង ផុនធាណាក់ (Pontianak) ស្ថិតនៅក្នុងខេត្តកាលីម៉ាន់តាន់ខាងលិច (West Kalimantan)។

ទិន្នន័យពីវែបសាយ Flightradar24 បានបង្ហាញថា នៅរយៈពេល៤នាទីក្រោយហោះឡើងចេញពីទីក្រុងហ្សាការតា ទាំងមានភ្លៀងធ្លាក់ខ្លាំង យន្តហោះរបស់អាកាសចរណ៍ Sriwijaya បានបាត់បង់រយៈកម្ពស់ដល់ទៅប្រមាណ៣,០០០ម៉ែត្រ តែក្នុងពេលមិនដល់១នាទីឡើយ មុនពេលបាត់ចេញពីក្នុងប្រព័ន្ធរ៉ាដា និងចូលក្នុងសមុទ្រ។ បើតាម រដ្ឋមន្ត្រីដឹកជញ្ជូនឥណ្ឌូណេស៊ី លោក Budi Karya Sumadi យន្ដហោះនេះបានធ្លាក់ចូលក្នុងសមុទ្រជ្វា (Java Sea) ស្ថិតនៅក្បែរកោះ Laki ដែលស្ថិតនៅ ចំងាយ២០គីឡូម៉ែត្រ ពីអាកាសយានដ្ឋានអន្តរជាតិក្នុងរដ្ឋធានីហ្សាការតា៕