មេបញ្ជាការសុនខ ដែលទទួលបានគ្រឿងឥស្សរៈយស្សច្រើនបំផុតរបស់អាមេរិក ជាមួយភាពក្លាហានក៏គួរឱ្យស្ញប់ស្ញែង

161

បញ្ហាសង្គ្រាមជាញឹកញាប់ត្រូវបានអមដោយវីរបុរស ហើយអ្នកដែលពូកែខាងធ្វើសង្គ្រាមច្រើនតែមានកិត្តិយស ឬត្រូវបានគេហៅថាជាវីរៈបុរស ។

ប៉ុន្តែតើអ្នកដឹងទេថាក្នុងចំណោមវីរបុរសនៃសង្គ្រាមទាំងនោះ ក៏មានវីរបុរសដែលមិនមែនជាមនុស្សដែរ តែគឺជាសុនខក្លាហាន ហើយបានក្លាយជាការចងចាំរបស់មនុស្សទូទាំងពិភពលោក ថែមទាំងទទួលបានមេដាយមាសច្រើនបំផុតនៅក្នុងប្រវត្តិសាស្ត្រផងដែរ ។

នេះជារឿងរ៉ាវរបស់សត្វសុនខពូជ Boston Terrier ឈ្មោះស្តុបប៊ី (Stubby) កើតនៅឆ្នាំ ១៩១៦ ក្នុងកំឡុងពេលសង្គ្រាមលោកលើកទី ១ ទូទាំងទ្វីបអ៊ឺរ៉ុបនិងពិភពលោកទាំងមូល ។

តំបូងឡើយស្តុបប៊ី ត្រូវបានគេរកឃើញខណៈពេលវាកំពុងវង្វេងផ្លូវ នៅបរិវេណមហាវិទ្យាល័យ Yale នៅ New Haven ក្នុងឆ្នាំ ១៩១៧ ពេលនោះសមាជិកនៃកងវរសេនាធំទី ១០២ ដែលបានទទួលការបណ្តុះបណ្តាលនៅក្នុងតំបន់នោះបាននាំស្តុបប៊ីមកនៅជាមួយ ។

ក្រោយមកស្តុបប៊ី ត្រូវបានគេបញ្ជូនទៅរណសិរ្សបារាំង (តាមរយៈការលួចនាំឡើងលើទូកដោយសម្ងាត់) ក្នុងនាមជាសុនខយាមនៅនៅក្នុងជំរុំយោធារបស់សម្ព័ន្ធមិត្ត ។

ក្នុងរយៈពេល ១៨ ខែដែលស្តុបប៊ីបានចូលរួមប្រយុទ្ធ វាបានឆ្លងកាត់ការប្រយុទ្ធជាមួយសត្រូវចំនួន ១៧ លើក ក្នុងនោះមាន ៤ លើកដែលវាត្រូវបានគេចាត់ទុកថាជាការវាយលុកផងដែរ។

ហើយបេសកកម្មដ៏គួរឱ្យចាប់អារម្មណ៍មួយទៀតរបស់ស្តុបប៊ី គឺនៅក្នុងកំឡុងខែមេសាដែលវាអាចរក្សាជីវិតខ្លួនឯង ពីហេតុការណ៍បន្ទុះគ្រាប់បែក ។

លើសពីនេះទៀតក្នុងឆ្នាំដដែលនោះ វាក៏បានរួចផុតពីការវាយប្រហារដោយឧស្ម័នហ្គាសជាច្រើនលើកច្រើនសារ កត្តាទាំងនេះហើយដែលធ្វើឲ្យទាហានទាំងអស់កោតស្ញប់ស្ញែងចំពោះភាពប៉ិនប្រសព្វរបស់ស្តុបប៊ីជាខ្លាំង ក្រោយមកពួកគេក៏បានបង្កើតរបាំងមុខការពារឧស្ម័នជាពិសេសសម្រាប់ស្តុបប៊ីទៀតផង ។

របាំងមុខការពារឧស្ម័នពិសេស

នៅមិនទាន់អស់ទេ ក្នុងអំឡុងពេលឆ្មាំនៅក្នុងជំរុំ ដោយមនសិការច្បាស់ជាងមនុស្ស ស្តុបប៊ីក៏តែងតែជាអ្នកដាស់តឿនដល់ក្រុមទាហានអំពីការឮសូសម្លេងកាំភ្លើងធំ ឬការវាយប្រហារដោយឧស្ម័នមុនពេលមនុស្សដឹងអំពីវាទៅទៀត ។

សំខាន់ជាងនេះទៅទៀត នៅក្នុងសង្គ្រាមនៅ Argonne ស្តុបប៊ី ក៏ធ្លាប់មានស្នាដៃក្នុងការចាប់វានចារកម្មរបស់អាឡឺម៉ង់បានដោយខ្លួនឯងទៀតផង។

Original caption: Washington, DC: Meet up with Stubby, a 9-year-old veteran of the canine species. He has been through the World War as mascot for the 102nd Infantry, 26th Division. Stubby visited the White House to call on President Coolidge. November 1924

សម្រាប់សមិទ្ធិផលទាំងអស់នេះ បានធ្វើឱ្យស្តុបប៊ីទទួលបានឋានៈជាមេបញ្ជាការ ក្នុងអំឡុងពេលបម្រើការប្រទេសជាតិ ជាមួយនឹងគ្រឿងឥស្សរៈយស្សបញ្ជាក់ភាពក្លាហានជាច្រើនមានដូចជា ៖

– សក្តិ Service Stripes 3

– គ្រឿងឥស្សរៈយស្ស Yankee Division YD

– មេដាយមាស French Medal Battle of Verdun

– មេដាយមាស 1st Annual American Legion Convention Medal

– មេដាយមាស New Haven WW1 Veterans Medal

– មេដាយ Republic of France Grande War Medal

– មេដាយ St Mihiel Campaign Medal

– មេដាយ Purple Heart

– មេដាយ Chateau Thierry Campaign Medal

– មេដាយ 6th Annual American Legion Convention

និងមេដាយរងជាច្រើនទៀត ។

មេបញ្ជាការស្តុបប៊ី បានទទួលគ្រឿងឥស្សរៈយស្សទាំងអស់នេះ នៅពេលសង្រ្គាមត្រូវបានហើយស្តុបប៊ីបានក្លាយជាសត្វសុនខ ដែលទទួលបានគ្រឿងឥស្សរៈយស្សច្រើនជាងគេបំផុតនៅក្នុងពិភពលោក។

ដោយសារតែភាពក្លាហានទាំងនេះ ស្តុបប៊ីបានក្លាយជាតារាដែលមានប្រជាប្រិយភាពបំផុត ថែមទាំងមានសិទ្ធិដើរតាមក្បួននៃកងទ័ពក៏ដូចជាបានជួបប្រធានាធិបតីអាមេរិកដល់ទៅបីនាក់ទៀតផង ។

ឧត្តមសេនីយ៍ John Pershing បានប្រគល់មេដាយមាសដល់មេបញ្ជាការស្តុបប៊ី

ពីសត្វឆ្កែអនាថានៅតាមចិញ្ចើមថ្នល់ រហូតបានក្លាយជាមេបញ្ជាការ និងបានចំណាយពេលពេញមួយជីវិតបង្កើតជារឿងព្រេងរបស់មេបញ្ជាការសុនខ ។ បន្ទាប់ពីសង្គ្រាមត្រូវបានបញ្ចប់ ស្តុបប៊ីបានប្រើជីវិតរស់នៅបម្រើការកាកបាទក្រហមរហូតមក ។

ក្រោយមកមេបញ្ជាការរូបនេះក៏បានលាចាកលោកដោយសន្តិភាព នៅខែមីនាឆ្នាំ ១៩២៦ ហើយសាកសពរបស់ស្តុបប៊ី ត្រូវបានគេរក្សាទុកតាមបែបវិទ្យាសាស្ត្រនៅឯវិទ្យាស្ថាន Smithsonian រហូតដល់សព្វថ្ងៃទៀតផង ៕

ប្រភព៖ ct.gov , historyextra